 |
| o director de cinema Ángel Santos |
Se unha compoñente da nosa cultura converteuse en protagonista durante os
últimos anos esa foi o cinema. O chamado Novo Cinema Galego desenvolveu unha
serie de proxectos individuais que dende a renovación de linguaxes e o interese
das historias contadas configurou unha nova paisaxe das nosas imaxes.
O actual éxito de 'O que arde' de Oliver
Laxe non é máis que o cumio de toda unha serie de achegas que converteron ao
cinema feito en Galicia en toda unha referencia a nivel mundial, amosando o que
somos quen de facer con non demasiados presupostos pero si cunha fonda
sensibilidade a hora de facer producións de calidade e interese.
A páxina web Novo Cinema Galego
convídanos a coñecer moitos deses filmes que chanzo a chanzo xeraron o que é o
hoxe o noso cinema. Un xeito solidario que as xentes do cinema teñen demostrado
en non poucas ocasións para esa sociedade da que saen e á que chegan as súas
películas. Poder gozar de balde nas nosas casas de filmes como 'Jet lag' de
Eloy Domínguez, 'Arraianos' de Eloy Enciso, 'La brecha' de Marcos Nine, 'O
Cazador' de Ángel Santos, 'Todos vos sodes capitáns' de Oliver Laxe ou
'vikingland' de Xurxo Chirro é toda unha marabilla para tentar aliviar estas
horas do desasosego, este tempo de imaxes que nos levan a un escenario abofé inimaxinable
polos nosos creadores pero que vén a demostrar como a realidade moitas veces
supera á ficción.
Publicado en Diario de Pontevedra 22/03/2020
Ningún comentario:
Publicar un comentario