Galicia é unha festa

[Ramonismo 32]

Xurxo Lobato achéganos un espectacular percorrido fotográfico por esa singularidade do noso país como son os festas

Festa do Albariño en Cambados (Xurxo Lobato)

Festas relixiosas, festas gastronómicas, festas adicadas a conmemoracións históricas... festas e máis festas. Galicia é unha festa e poucas situacións nos identifican máis como o pobo que somos que ese carácter festivo, que esas celebracións comunitarias que nos levan a xuntarnos arredor dun motivo para celebrar algunha cuestión en concreto, aínda que o que celebremos finalmente é a vida e todo o que nos pode dar.

A nosa terra está sementada de citas festivas, de norte a sur ou de leste a oeste, a nosa xeografía é un permanente recital de celebracións. A elas achégase o fotógrafo Xurxo Lobato no libro ‘Galicia é unha festa’ para facer unha compilación de instantes, de fotografías que resumen, como poucas cousas, o que acontece en cada unha desas celebracións. Un libro para fachendear de nós mesmos e da nosa capacidade para sentir a festa como parte da nosa identidade, para converter cada un deses escenarios, algúns deles ben singulares, nunha parte do noso folclore e dunha forma de patrimonio de tipo inmaterial que se leva no interior das sucesivas xeracións que cumpren o rito de participar desas convocatorias.

Antes de chegar ás imáxes o libro engrandécese coa participación de Felipe Senén a través dun prólogo no que sitúa o contexto axeitado dentro dun marco histórico, pero tamén fala da diversidade de espazos e as características de cada unha desas festas. Os santos, as romarías, o rural, o urbano, a música... en definitiva, unha chea de componentes xenéricas que teñen en cada unha das entradas propostas polo fotógrafo a súa rede particular de citas. Cando accedemos a cada unha delas a calidade das fotografías ensalza as festas para sumerxirnos neses universos de cor e celebración, de maxia, ledicia ou devoción e que, dun xeito tan particular, é quen de recoller o autor do libro. Xurxo Lobato acada ese punto de vista diferente nun tema xa moi explorado, dende o publicitario ou a investigación patrimonial, pero o que logra o fotógrafo coruñés e atopar un punto de vista co que nos fai participar da propia escena. Planos impredecibles, instantes conxelados, detalles que só a mirada casual e nunca pretendida do que está alí presente é quen de concederlle ese sentido de inmediatez que lle outorga a vida que todas as imaxes do libro conteñen.

Estamos ante un libro imprescindible para achegarnos a todo este universo das festas en Galicia. A calidade na súa edición, a potencia das fotografías e os textos que as acompañan, asinados por Omayra Lista, converten a este volume nun compás máis que axeitado para ter connosco unha parte de nós mesmos. O propio Xurxo Lobato nas súas palabras de presentación fala das festas como os espazos nos que «a xente se expresa con máis liberdade e menos ataduras», o que encaixa perfectamente nese labor que o fotógrafo vén facendo dende hai máis de corenta anos de «retratar ás xentes do meu país». Pois aquí as tedes, xentes dunha chea de recunchos, dende Malpica ata o Caurel, dende Ortigueira ata Baiona, e todos eles cunha mesma paixón, a de gozar a vida en comunidade e apegada a súa terra.

Especial atención se adica a unha das nosas grandes celebracións comúns a toda Galicia, o Entroido, a través dun capítulo final, tamén introducido por Felipe Senén, e no que se nos amosa esa diversidade de Entroidos, de traxes e máscaras, de cores e ritos que fan desa festa un motivo moi especial no noso calendario festeiro, tan cheo de propostas como de imaxes e que tan ben reflicte coa súa cámara Xurxo Lobato neste exemplar e necesario traballo.

Publicado na Revista Diario de Pontevedra 11/07/2020