Escaparate de arte e letras

Rúe Saint-Antoine nº 170

Creación ▶ Taller Abierto é un colectivo que, ubicado na praza da Estrela, no Pazo dos Barbeito, propón dende a súa creación un suxerente número de actividades para, dende o cultural, implicarse na cerna de Pontevedra. Aproveitando o pulo do Salón do Libro superaron unha barreira física dende o maxín para entrar en varios escaparates da cidade.

Entre os moitos agasallos que nos ofrece o Salón do Libro dende o ano pasado achéganos esta deliciosa maneira de percorrer a cidade, de facelo de escaparate a escaparate, de relato a relato e de soño a soño. Se o ano pasado foron varios artistas os que fixeron unha intervención nos comercios escollidos, este ano encárgase da súa elaboración un deses milagres que de vez en cando xurden nunha cidade. Ese milagre ten o nome de Taller Abierto, un colectivo de tres mulleres, África Martínez, Marta Guirado e Ana Barreiro, cheas de gañas de facer proxectos culturais coa cidade de Pontevedra como soporte. Dende a súa creación artellaron diferentes actividades que van dende cursos e talleres de cine, fotografía, literatura ou pintura, para maiores ou cativos, ata visitas a diferentes espazos para intentar afondar nunha das súas grandes preocupacións, como é o da dinamización do noso patrimonio, do tipo que sexa, a través da acción do cidadán.

Nestes días, e amén doutras actividades vencelladas ao Salón do Libro, centráronse nesta acción chea de imaxinación e potencialidade para engaoilar ao espectador como é a intervención en nove escaparates doutros tantos establecementos de Pontevedra para unir o territorio urbano co que acontece no Pazo da Cultura, cerna dun Salón que non deixa de espallar, como as follas dunha árbore, as súas beizóns sobre a cidade que o acolle.

Non é sinxelo meter nun espazo pechado e moi delimitado algo concibido dende a imaxinación, algo feito para ser libro, para voar, é como meter ao xenio na súa lámpada maravillosa. Pero Taller Abierto amosou a súa intelixencia para facer da parte o todo, para simbolizar dun xeito directo cunha serie de obxectos e unha escenografía atraínte para o camiñante, nove relatos que forman parte da nosa historia literaria, pero tamén sentimental, xa que moitos deles son narracións moi apegadas ao noso crecemento e ao proceso de formación como persoas.

Arrinca o percorrido en Juncal Alimentación, ese paraíso do bo comer do que xa e difícil escapar de pegar o nariz ao seu escaparate habitualmente, polo que alí se amosa, e que agora presenta unha mesa cun xogo de té disposto para que te sentes... e ao seu carón un sombreiro de copa. Un libro aberto espanta as dúbidas que puidera haber: ‘Alicia no país das marabillas’. Achegámonos á Praza da Peregrina, alí, na patria das chuches, La Metro Comestibles, atopamos unha chea de mazás vermellas sobre libros. A mazá vermella. Poucos elementos son quen de levarte dun xeito tan directo a un conto, ‘Brancaneves’. Baixamos polos Soportais, alí, nun dos nosos comercios máis antigos, A moda dabaixo atopamos un deses recunchos que a literatura converte en máxicos, un espazo feito á medida do lector: unha butaca, unha mesiña, unha lámpada, uns lentes, unha morea de libros. Ese espazo  é o espazo de todos os lectores. Baixamos uns metros, ata a praza de Curros Enríquez, alí, na Droguería Moderna, é o turno das meigas, da alquimia, da escuridade, alí unhas pernas de nenos asoman por un caldeiro e un texto lévanos a pensar en ‘Hansel e Gretel’.

Pola rúa Real, rúa do Camiño a Compostela, tránsito de lendas entre pobos e persoas, dous escaparates máis nos convocan. El Cisne, onde o ano pasado Manuel Moldes profetizara a rexeneración da democracia cun anel de chourizos, agora espállanse unhas ringleiras de frutos secos que semellan movidas por un exército de formigas, fronte a elas unha guitarra, lecer e diversión. ‘A cigarra e a formiga’. Uns metros máis abaixo, Cestigar, supervivente dunha traxectoria de cesteiros que enchía de olor a bimbios toda a rúa. No seu escaparate un berce de palla sustenta a historia de ‘O lobo e os tres porquiños’. Uns poucos ladrillos, e uns troncos fálannos dos materiais das súas casiñas, e sobre eles tres cadeiras.

Chegamos á parte final do roteiro, destes retallos de contos que fan da parte o todo. Na praza de Méndez Núñez, na Casa dos Paraugas, Ernesto Filgueira, acolle un paraugas suspendido no aire e unha bolsa de viaxe sobre unha morea de páxinas, rápidamente pensamos en ‘Mary Poppins’ e como con tan pouco se pode reflectir tanto. Na rúa Sarmiento chega a hora de Julio Verne. Don Julio. As súas ‘20.000 leguas de viaxe submariño’ e un universo cheo de peixes de papel que enchen o escaparate de Foto Merchy Gómez. Última parada, Amarante, na rúa San Román, un feixe de rapaces, que andan de excursión, afunden o seu nariz no cristal. Unha alfombra, abofé que máxica, e unha lámpada marabillosa, levannos ‘As mil e unha noites’, e tamén ao final deste fermoso percorrido que fía diferentes contos.

Páxinas escritas e agora páxinas representadas dende nove ventás cheas de ilusión. Ilusión dos que nos achegamos a elas, pero tamén das súas creadoras, polo ben feito, e que completan a súa achega ao Salón do Libro con diferentes talleres vencellados á pintura, o debuxo, a xeometría ou a natureza, desenrolándose dentro da programación dese Salón que segue espallando pola cidade todo o seu potencial e que chega tamén a nós en forma de escaparates cheos de arte e letras para deixarnos alí pegados.

Publicado no Diario de Pontevedra 9/03/2015

Fotografías: Rafa Fariña