DENDE o pasado martes e ata o vindeiro
domingo cada tarde un conxunto de músicos portugueses de primeiro nivel abren
as súas casas e estudios para regalarnos media hora de concerto. #Euficoemcasa
é unha iniciativa que xorde dos artistas e das propias axencias musicais para
facer as obrigadas estancias do desasosego máis levadeiras, pero tamén para
situar nos medios de comunicación a problemática que esta crisis sanitaria
tamén vai a provocar no sector musical.
A cancelación de concertos, xiras e un
sinfín de espectáculos vai facer dos músicos unha das vítimas económicas da
crise, e deste xeito queren visibilizar esa situación. Así é como 78 artistas
adicarán media hora, a partir das cinco da tarde ata as once da noite (tede en conta a hora de diferencia horaria con Portugal), para
facernos chegar a súa música. Músicas diversas que chegarán a nós a través das
contas persoais de cada un deles en Instagram. Concertos que poderemos seguir
nos nosos teléfonos móbiles para sentirnos acompañados polos sons e sotaques
lusos.
Antonio Zambujo, Pedro Abrunhosa, Diogo
Piçarra, Ana Moura, Márcia, Samuel Úria, Capicua, Luisa Sobral ou Fausto, son
só algunhas das estrelas cómplices desta iniciativa solidaria que vén a
reivindicar o papel da cultura portuguesa como un dos orgullos dos nosos
veciños. Apenas uns días despois de saltar as alarmas sanitarias case oitenta
músicos puxéronse dacordo para que as tardes desta semana sexan unha festiña
musical en cada un dos fogares que queiran abrir as súas fiestras ás súas
voces.
Dende cada un dos nosos teléfonos
buscando por #Euficoemcasa podemos atopar a programación diaria que, por citar
algúns exemplos, hoxe terá a Marco Rodrigues, Agir, Pedro Abrunhosa, Capicua ou
Pedro Mafama. Mañá día 21 a Rui Massena, Héber Marques, The Legendary Tigerman
ou Ana Bacalhau e o remate, o domingo 22 a, entre outros, a Nuno Ribeiro, Ana
Moura, David Carreira ou Luisa Sobral. Todos eles e elas están esperando a
oportunidade de deixalos pasar ás súas casas. Unha ocasión única para achegarse
as mellores músicas de Portugal dende o compromiso dos seus artistas. Ate já!
Publicado en Diario de Pontevedra 20/03/2020
Ningún comentario:
Publicar un comentario